گون گدی زردی قالدی
ال گدی گردی قالدی

اپمه دیم آلا گزدن
یورگمده دردی قالدی

ننه- طهماسب نجفی

ننم منه ننی دوتار
دائم خفته بیدار یاتار
گر آغلاسام عزا دوتار
چارسی بی چاره ننه

اَل اُیسنه قوجاقوندا
اُننّی نینگ قراقوندا
آغ ممنگ اُغلونگ آغزوندا
مهر محبّتلی ننه

اُبیمار اُلسانگ تاب اِدمز
اُگجه اوخویا گدمز
خوب پرستاردور ویل ادمز
دائماً پرستار ننه

خوش بویونگ دوتار مشاموم
سن قویدوگونگ اسم-و ناموم
اُورگدیگلینگ حق-ي سلاموم
ازل گوندن استاد ننه

گجه یاری لای لای چالور
اَل قویار لبینگه گِلور
بیماراُلسانگ درمان بولور
اُدرد لره درمان ننه

باغلار دالونا یول گِدر
اُرغیبدن حذر اِدر
سود ِوِریب شاداب اِدر
َلبَلرِ شاداب اِدَن ننه

هر ساعته بیر یردیم
حق النیدن آزردیم
من طهماز افسرده یم
صد واویلا فریاد ننه

شاعر: طهماسب نجفی

سوروش قَرَه داغدان -میرزا مأذون قشقایی

مایل اُولما شمعِنگ روشن اوزونه
دوستونی یاندوران اوتا سالاندر

گوزنگ سالما گوَزللَرینگ گوزنَه
ناز-و غَمزَه لَری جانونگ آلاندر

گَل منَدن احوال آل روزگار دَردی
من چَگمیشم هجران دردی، یار دردی

سوروش قَرَه داغ´دان چگمیش قار دردی
خوبلارونان سودا اِدَمِِگ قاشی کمانلار

تلخ اِدَر اوقاتونگ شیرین زبانلار
کمان اِدَر بِلنِگ قاشی کمانلار

مَندَن سیزَه زنهار اولسون جوانلار
اینچیه بَلِه بِل باقلاماگ قلاندر

قان اِدَر باغریگی مژگان-ي خنجَری
آپارور صبریگی نارِ-ي نوبَری

عطرِ-ي دماغ اِدمَه زلفِ-ي عنبری
تارِ-ي زلفی صَرّافلی ایلاندر

اگر عارِفِسَنگ دوسمَه کَمَندَه
سالوب عارِ فَلری زنجیَره٬ بَنده

اَل دَیمَه زلفونا دوشمَه کَمَندَه
بیر زلفی عقربدر٬ بیری ایلاندر

قشنگ قِزِنگ سَودیگینیدَه صفا وار
صفاواردر، بلاواردر، جفا واردر

مأذون دِسَه شوخ گوزَلَده وفا وار
اِینانمایونگ شاعر سوزی یالاندر

شاعر: میرزا مأذون قشقایی

طهماسب نجفی- بهارا باخ٬ بهارا

باخ بو گلا باخ بو قشنگ بهارا
شکر الله دنیا اُلموش گلارا

یازّی سبزه خرم گل بی شمارا
حق نعمتی بهارا باخ٬ بهارا

خوشا اُ دل گلا وارودور نسبت
بو بهار چاقوندا ایلیه عشرت

خوشا گوینی که واری یار-ي باعزّت
گل عطریندن بهارا باخ٬ بهارا

قدرت-ي الهی دنیا گلستان
گل آچولموش در-و دشت-و بیابان

خوشا دلی که واری یار-ي مهربان
بی وفا یار بهارا باخ٬ بهارا

داغلار تمام یک رنگ اُلموش سبزه پوش
دشت-و چمن باغ بهار٬ گوش به گوش

گل عشقیدن بلبل مغرور-و مدهوش
صوت بلبل بهارا باخ٬ بهارا

چایلار کمی تمام اُلموش سبزه زار
بهار فصلی گوینوم اُلموش بی قرار

شکرونگ اُلسون اُ کریم-ي کردگار
حق لطفوندان بهارا باخ٬ بهارا

گلّار تمام آغ و ساری گل اندک
باغلا ر ایچی آچو لمو شد ورگل پیچیک

گل-و سنبل گيموش بنفشه کونیگ
بو رنگ به رنگ بهار را باخ٬ بهارا

حق یولوندا گوینوم اُلموش پروانا
تا یانماسا قبول ادمروز ویرِ انا

گونگول مایل اُلما باغ بستانا
عمر فانی بهارا باخ٬ بهارا

منیم گونیوم بهاری تازا اُلماز
گدی عمرفانی هِیچ گِری گَلمز

نچون گُرنگ قره داغلار قوجالماز
قوجالماز داغ بهارا باخ٬ بهارا

بلبل اُلموش شیدا گلّار مشتاقی
همیشه غمگیندور دلبریم باغی

منیم گوینوم اُلموش حسرت اُتاقی
دیر طهماز بهارا باخ٬ بهارا

شاعر:طهماسب نجفی